من هو الشعب ؟!؟

من هو الشعب اللي ينطر المعاش من ثاني اسبوع في الشهر؟

من هو الشعب اللي يسكن في بيت اسكان عبارة عن 'قرقور' ويبني فيه كل سنتين حجرة وحمام ويدفع فيه دم قلبه عشان يصير ملكه

عقب 30 سنة، حزتها يكون البيت تشلخ وتوصيلات الماي والكهرباء اختربت

من هو الشعب اللي يضحي بنص معاشه لمدة 7 سنوات عشان يركب سيارة يدور فيها؟

من هو الشعب اللي معظم بناته يلبسون دفة أم فصوص سوارفسكي قيمتها على الأقل 50 دينار، وتحتها توب وجينز من محل 'بودينار'

من هو الشعب اللي لهجته مالها معالم، شبابه إذا بيتفشخرون تكلموا سعودي 'بدوي يازعم'، وبناته إذا بيتدلعون تكلموا كويتي؟

من هو الشعب اللي كل ما 'كح' واحد قال لك آنا فلان بن فلان آل فلان من الفخذ الفلاني والبطن الفلاني والخشم الفلاني، وأصلنا وفصلنا وقبيلتنا...

وتلقاه لا أسلوب ولا منطق ولا هدف؟

من هو الشعب اللي كل الناس فيه عندها سيارة، مع ان إذا تقط حصاة من محرق تطق راس واحد في الرفاع

من هو الشعب اللي أحلام شبابه المستقبلية للعشرين سنة القادمة تنحصر في 'موتر'، ووظيفة في القوة أو في الحكومة بمعاش 300؟

من هو الشعب اللي عدد المسجلين في الجامعة 4000، واللي يتخرجون 1000، والـ3000 الباقي نصهم يسبون في التعليم العالي، والنص الثاني

يكمل في جامعات خاصة ويتخرج مع مرتبة الشرف؟

من هو الشعب اللي عندهم 100 فرع مكادونالدز وكنتاكي وهاديز وجسميز، و2000 محل عبايات، و1000 محل dvd، و5 مكتبات عامة

كلها غبار وقصص يهال وموسوعات من الثمانينات؟

من هو الشعب اللي عنده برلمان كل نوابه يسوقون بي إم دبليو ومعاشتهم فوق 3500، وعندهم تقاعد ومكافآت وسفر وإجازة 5 شهور،

وجواز دبلوماسي لكل عائلته، وكلهم طق بشوت وميالس وصور في الجرايد، وكله من دم الشعب

(ملاحظة: النواب أغلبيتهم بدون شهادات أو خبرات تذكر غير اللحية وماشابه)

من هو الشعب اللي أكبر مستشفى عندهم يعرف بإسم: 'المصلخ'، يدخلون الناس يمشون على ريولهم ويطلعون في اسعاف إلى المقبرة

من هو الشعب اللي إذا ذابحتهم الأناسة يرحون العمرة أو كويت في الباص خميس وجمعة؟

من هو الشعب اللي لازم يشرب ستاربكس أو كوستا كوفي بدينارين، حتى لو آخر الشهر، وحتى لو الدينارين نص الفلوس الباقية من المعاش؟

من هو الشعب اللي يتجمع كله في مجمع واحد بيوم واحد في وقت واحد عشان يستمتع بإجازة نهاية الأسبوع؟

(ملاحظة: إذا في أحد ماشفته من زمان او تطالبه فلوس روح مجمع السيف ويك اند الساعة 7)

من هو الشعب اللي كل أفراده يصيرون حق بعض ويعرفون بعض، وماينخش الخبر عندهم أكثر من ساعة؟

من هو الشعب اللي وقت الدوام الصبح يتجمع في شارع واحد 'شارع الملك فيصل' ويتم في ازدحام يومي لمدة ساعة، ويكرر نفس العملية

آخر الدوام من 25 سنة؟

من هو الشعب اللي كل خريجين الثانوية بيصرون أطباء ومهندسين ومدرسات وبس؟

من هو الشعب اللي في آخر سنتين كل بناته صاروا 'عيال حمايل' يلبسون دفاف ستايل وشنط تقليد، و5 كيلو مكياج ومغرورات على الفاضي؟

من هو الشعب اللي شبابه دايما كاشخين ونافخين ورصيدهم في الحياة صفر؟

من هو الشعب اللي لازم كل بيت في كورولا او كريسيدا

من هو الشعب اللي قبل كل عيد 80% من الناس يروحون السعودية ويقعدون في الجسر 6 ساعات عشان مجمع الراشد ومجمع الظهران؟

من هو الشعب اللي خريجين الثانوية والجامعة مايفكون الخط في الإنجليزي؟

من هو الشعب اللي يدامون قبل العيد بيوم، ويرجعون الدوام رابع العيد؟

من هو الشعب اللي شبابه فتاة أحلامه: حلوة وتشتغل مدرسة وتطبخ وتكشخ لي؟

من هو الشعب اللي بناته فتى أحلامها: غني وولد عايلة وعنده سيارة كشخة ويشتري لي سيارة ويصرف علي ويخليني على كيفي

من هو الشعب اللي 99.9999% منه عندهم قروض شخصية وقروض سيارة واسكان تآخذ ثلاثة أرباع المعاش وتنتهي بعد 300 سنة

من هو الشعب اللي يطق عندهم مطر خفيف اسبوع في السنة، ومطر غزير يومين في السنة، والنتيجة 90% من البيوت تخر،

ونص السيارات تغرق في الشارع، والفرجان تتحول إلى مدينة البندقية

من هو الشعب اللي عنده موسم خاص لانقطاع الكهرباء، على الأقل 5 ساعات كل كم أسبوع في الصيف

'للعلم الدولة نفطية وبيوتها تعادل فريج في السعودية'

من هو الشعب اللي فيه هنود محتلين فرجان محرق وقضيبية، وكلهم بنايين ونجاجير وخياييط

من هو الشعب اللي عنده فريق كرة قدم يفوز مرة ويخسر مرتين ويفشلنا 200 مرة؟

من هو الشعب اللي تشرق عليه الشمس الحارة 11 شهر ونص في السنة من آلاف السنين، وكل يوم يتحلطمون

على الحر والرطوبة ولا عمرهم فكروا يمشون بمظلة خوفاً على البرستيج؟

من هو الشعب اللي يسوي زواج جماعي حق 500 شاب وفتاة كل شهر؟

من هو الشعب اللي يسوي حفلات تخرج بلباس وكشخة للثانوي والإعدادي والإبتدائي والروضة والحضانة وصف التفاحة وصف العنزة،

والصور تترس الجرايد والمجلات على مدى 6 شهور من بعد التخرج الميمون؟

من هو الشعب اللي إذا راحوا يخيمون يابوا 20 سرير وطقم ميلس وحمام ديلوكس وبوابة حديد و40 ليت فلورسنت طويل وخدامتهم

(ملاحظة: البعد بين المخيم والثاني متر، من الضيق، موكأن نص الديرة بر)

من هو الشعب اللي كل ممثلينه وممثلاته القديرين والتعبانين كلهم شردوا وراحوا قطر وكويت وطلع ابداعهم وصاروا فنانين الصف الأول،

لا ومطلوبين بأغلى أجر؟

من هو الشعب اللي لازم كل واحد منهم دش جمعية لو على الأقل 20 دينار؟

من هو الشعب اللي يصب بترول بدينار، وساعات بنص دينار؟

من هو الشعب اللي لازال أفراده من 20 سنة يروحون يطالعون الألعاب النارية في 16 ديسمبر، وتصتك عليهم في الزحمة ويطالعونها

من دريشة السيارة ويرجعون البيت عقب 4 ساعات؟

من هو الشعب اللي إذا استبردوا اسبوع، البرانيص والدلاغات والقبعات والقفازات والدفايات والجاكيتات والشالات تخلص من السوق

من هو الشعب اللي غالبيته تشتري كل أغراض البيت والوايرات والألعاب والثياب من رامز لأن أرخص؟

عرفتوا من هو الشعب؟؟؟؟

هههههههههههههههههه صح صح

ههههههههههههههههههه معروف الشعب ههههههههه

.:.][ يسلموو أبوي على الطرح المميز و المتميز ][.:.

.:.×.:. حياة مليئة بالود و المحبة .:.×.:.

ههههههه ولله للحين مارعرفت من اهوة الشعب ..؟؟؟

ماعرفت منو الشعب